logo
Il Portale turistico del Comune di Gorizia

 

link versione italianalink versione slovenalink versione friulanalink versione ingleseicona webcam
link alla homelink a contattilink alla mail
link alla storialink ad eventilink alle newslink ai percorsi a temalink alla ricettivitŕ link a prodotti tipicilink a links
Home > Storie di Guriza > Nûfcent: secul tragjic

Storie di Guriza

Nûfcent: secul tragjic

Tal Nûfcent il travai spirituâl prin e dopo de Grande Vuere, che, subit finide, la citât e devente taliane, al cuiste carateristichis speciâls massime tal cjamp de art figurative. Cussì Italico Brass, Edoardo Delneri, Vittorio Bolaffio, Gino De Finetti, Veno Pilon, Sofronio Pocarini, Luigi Spazzapan, Tullio Crali, Raoul Cenisi, Zoran Music a scrivin pagjinis vivis e particulârs de storie de art.
A son i events politics a segnâ in mût speciâl la vite da la citât. Guriza, in timp de Prime Vuere Mondiâl, vignude a cjatâsi sul front principâl tra Austrie e Italie, e devente il sît di scuintris là che a muririn in tancj, lis famosis “12 bataiis dal Lusins”, cjamp di bataie par plui di doi agns. Dopo 14 mês di ardîts combatiments, ai 8 di Avost dal 1916 lis trupis talianis a jentrarin a Guriza.
La ritirade di Cjaurêt e fo la ocasion par lis trupis austriachis di tornâ te citât (Otubar dal 1917). La capitolazion da la Austrie-Ongjarie, la Vitorie de Italie e la fin de vuere (Novembar dal 1918) e i tratâts di Saint-Germain e di Rapallo a puartarin a la definitive anession di Guriza ae Italie. Dilunc dai vincj agns di regjim fassist, Guriza e regjistrà la costruzion di cualchi lûc preseabil come il Palaç des Puestis e chel de Cjamare di Cumierç, la ricostruzion dal Cjistiel, pe plui part sdrumât intant de Prime Vuere Mondiâl. Il fassism al scomençà une talianizazion sfuarçade de largje provincie di Guriza, dulà che a jerin a stâ popolazions slavis, massime te part orientâl.


La citât no fo sparagnade nancje da la Seconde Vuere Mondiâl. Dopo la bataie di Guriza dal Setembar dal 1943 tra partigjans titins, soldâts de Rsi e todescs, la citât e la Vignesie Julie dute a forin incorporadis tal Adriatisches Küstenland (Litorâl Adriatic), sot il diret control nazist, che al compuartà altris corots, tant che la deportazion e la distruzion tai cjamps di stermini da la comunitât ebraiche gurizane, cetant ative. Dopo la disfate dal esercit todesc e il so ritîr consecuent, la citât e fo ocupade dai partesans jugoslâfs di Tito dai 2 di Mai ai 12 di Jugn dal 1945 (duncje daspò de fin de seconde vuere mondiâl), vivint altris tragjics moments, cu la depuartazion e la disparizion, de bande des trupis jugoslavis di centenârs di citadins cence difesis; cetancj di lôr a forin massacrâts cuntune violence salvadie e butâts ancjemò vîfs tes foibis, forans fonts di formazion carsiche.
Il tentatîf ustinât dal guvier comunist jugoslâf di Tito di cjapâ dentri Guriza al fo sfantât de reazion risolude de popolazion taliane, si de adun dute in place  scjampant cussì di finî sot de ditature  comuniste jugoslave e sielzint cun risoluzion di partignî al Ocident democratic.
I events storics e politics subit finide da la Seconde Vuere Mondiâl a verin efiets penç e di lungje durade par Guriza: tal Setembar dal 1947 la citât e fo, in pratiche, dividude, cul separâle dai siei suburbis a Nord e a Est. Su la fonde dal tratât di Parìs, a forin metûts jù cjavai di frisie e filistrin spinât, segnant il gnûf limit tra Italie e Jugoslavie. Al cjapà cussì cuarp chel confin che al dividè cjasis, stradis, fameis; di là di chest e nasseve cussì, tal zîr di pôcs agns, par volê di Tito, la citât di Nova Gorica.


Ai 10 di Novembar dal 1975 al fo firmât il tratât di Osimo, che al ratificà chel dal '47, rindint definitîf il confin “mobil”. Daspò, par cure dal Istitût Gjeografic Militâr di Florence e di une istituzion jugoslave parele, e fo eliminade la “tendine di fier” e rimplaçade cuntun muret cun parsore une rêt. Ai 25 di Otubar dal 1977 i militârs a firmarin il verbâl di poie dal clap marcât dal codiç 57/15 su la linie di confin tra i doi stâts, in face de stazion feroviarie da la Transalpina, vuê te Republiche di Slovenie. Tal Dicembar dal 2007, cu la aplicazion dai acuardis di Schengen fra Italie e Slovenie,  il confin al è stât gjavât vie par simpri. Guriza e torne a jessi cussì, come che simpri al è stât di in che volte che e je  nassude, il cûr di une aree  une vore  grande e interessant pe culture, pal turisim,  pe economie.
 

L M M J V S D
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31
banner sistemazioni

 


Realizzazione del Sito: Servizio attività economiche e sviluppo turistico.
e-mail: turismo@comune.gorizia.it