logo
Il Portale turistico del Comune di Gorizia

 

link versione italianalink versione slovenalink versione friulanalink versione ingleseicona webcam
link alla homelink a contattilink alla mail
link alla storialink ad eventilink alle newslink ai percorsi a temalink alla ricettivitŕ link a prodotti tipicilink a links
Home > Storie di Guriza > La ete dai Habsburg : 1509-1918

Storie di Guriza

La ete dai Habsburg : 1509-1918

A rivuart da la consistent e strategjiche ereditât di Leonhard si vierç un contenziôs di puartade europeane tra Vignesie e la cjasade di Austrie. L'imperadôr Maximilian, su la fonde di antîcs tratâts, al cjape possès imediât di Guriza e des sôs tieris. Ma Vignesie no sta a cjalâ e pôcs agns dopo cul esercit di Bartolomeo D'Alviano, a concuiste la citât: la fuartece, che e cjape dentri Borc Cjascjel, fidade a votcent oms armâts e ten bot al sburt par cualchi dì. I combatiments a son dûrs. La bandiere di San Marc e ven tirade sù sul cjastiel di Guriza ai 22 di Avrîl dal 1508.
Il domini venezian al dure pôcs mês, il timp di inviâ i lavôrs par adatâ il cjastiel medievâl daûr dai criteris de vuere moderne. Za l´an dopo i Habsburg a tornin in possès di Guriza, che e restarà austriache, a part la ete napoleoniche, fin a la Prime Vuere Mondiâl.
A dispiet da la riduzion drastiche dal teritori da la Contee decretade di Maximilian, risultât in pratiche limitât ai teritoris ator di Guriza, par la citât la apartignince a une entitât potent e organizade e puartà vantaçs economics une vore impuartants: si svilupe la viticulture e il teritori ator di Guriza si specialize soredut te produzion di vins blancs che a vegnin espuartâts in Austrie; e tache la coltivazion de cjanaipe e a nassin e si svilupin industriis tessilis che a lavorin ancje la lane: si sistemin lis stradis che a coleghin Guriza cu la Carintie par la vâl dal Lusins, ma ancje chês che le coleghin cu la Slovenie di vuê e chê pal mâr, viers Duin. Intun secul, il Cinccent, Guriza e passe di pôc plui di mil abitants a cuasi cuatri mil.


IL SÎSCENT E I ORDINS RELIGJÔS

I contrascj tra la cjasade di Austrie e Vignesie a van indenant, anzit a van di mâl in piês tal Sîscent, e si concludin in chel conflit costât tantis vitis umanis che al è passât inte storie come Vueris Gardiscjanis.
Dal 1616 al 1618 lis armadis si scontrin ator di Guriza, massime a Gardiscje, lassant come che a jerin, dopo trê agns di vuere, lis posizions dai doi aversaris.
Guriza no ven cjapade dentri tai scuintris e za tal 1615 in citât a rivin i Jesuits, che a vierzin lis primis scuelis publichis e il seminari e a inviin la costruzion da la glesie dedicade a Sant Ignazi, origjinâl esempli di stîl baroc locâl, cu lis tipichis cupulis a cevole. La vignude dai Jesuits e, plui indenant, di cetancj altris ordins religjôs e infuartìs in maniere decisive la cundizion culturâl da la citât. Un cuadri une vore interessant di chest timp al è stât tramandât di Giovanni Maria Marusig, che tal so libri ilustrât “Morti violenti e subitanee successe in Goritia”, al presente slambris di croniche (massime nere) che nus tornin vive in mut sorprendent la imagjin intate de vite di un secul.


IL SIETCENT: SECUL DI AUR

Tal Sietcent, considerât il secul di aur par Guriza, la popolazion e cres fin a vot mil abitants. Massime sot la imperadore Maria Theresia la citât si fâs biele. L´architet gurizan Nicolò Pacassi al progjete doi tra i plui biei lûcs da la citât: palaç Attems-Santacroce, vuê sede dal Comun, e il splendit palaç Attems-Petzenstein, sede dai Museus Provinciâi.
Simpri di Nicolò Pacassi al è il palaç imperiâl di Schönbrunn a Viene. La Ete dal Inluminisim e rapresente une feconde stagjon par lis arts e lis letaris. A miorin lis cundizions sociâls e a nassin i prins circui culturâi, come la Academie dai Filomeleti e chê dai Arcadi Romano-Sonziaci. A nassin lis primis stampariis, tesaurs dal artesanât locâl, là che a stampin lis lôr oparis Da Ponte, il libretist di Mozart, e Casanova. E cres une storiografie gurizane che e à in Rodolfo Coronini Cronberg e in Carlo Morelli i siei protagoniscj. Guriza e fâs di puint tra i inflùs di Viene e la prepotent influence artistiche veneziane: Giovanni Michele Lichtenreiter e Antonio Paroli a son i plui grancj rapresentants di une scuele di piture locâl che e cjape pît tal Sietcent.
In chest secul Guriza e cuiste la innomine di citât siore e trative. Carlo Goldoni: “No je provincie in Italie dulà che e sedi cetante nobiltât come in cheste”; Giacomo Casanova: “Mi fermai a Guriza fintremai ai ultins dal 1773 e in chês sîs setemanis di permanence o cjatai ducj i ricreis che o podevi desiderâ...”; Lorenzo Da Ponte, libretist di Mozart: “Par dute chê gnot no fasei che vaî nome al pinsîr di scugnî lassâ une citât, dulà che o jeri tratât cussì ben di ducj e dulà che o rivai des voltis a vê stime di me stes”.
A testemoneance di un timp di pâs e di tolerance e je la costruzion, tal 1756, da la Sinagoghe ebraiche, comedade tai agns dal ‘70 e che si pues lâ a visitâ ancje cumò.


IL VOTCENT: LA CRESSITE DE BORGHESIE

Tal Votcent Guriza, ancje se piçule e periferiche rispiet al imens e composit Imperi Austro-Ongjaric che e fâs part, e je une vivarose crosere di tensions ideâls. Carl von Czoernig al slargje la imagjin, deventade innomenade, di Guriza “Citât Zardin”, di “Nize di Austrie”, fin ai prins dal Nûfcent lûc privilegjât par lis feriis da la nobiltât asburgjiche. La citât si slargje bande Ovest e si delinie chel impront architetonic aristocratic e plasevul che ancjemò vuê le caraterize. In chest timp l´abitât al rive fin su lis spuindis dal Lusins, che a son une des bielecis da la citât in gracie des sôs aghis turchinis e des sôs rivis salvadis dut un boscam. Al è un moment di relatîf benstâ: la muse sodisfate di une borghesie in progrès nus ven tramandade dai ritrats di Giuseppe Tominz, che la pluipart des sôs oparis a son tignudis cun cure tai Museus de Provincie.
I fervôrs dai ideâi e lis aspirazions nazionâls e nazionalistichis a cjatin un teren favorevul te composite realtât da la citât. Di cheste complessitât culturâl e linguistiche si fâs interprit Graziadio Isaia Ascoli, glotolic di innomine internazionâl pai siei studis su lis lenghis indoeuropeanis. Il filosof Carlo Michelstaedter (1887-1910) ancje lui, come Ascoli, di origjin ebraiche, al rapresente une da lis espressions plui carismatichis da la culture europeane di chel timps. La summa dal so pinsîr al è in “La Persuasione e la Rettorica”, une clare analisi da la condizion umane che Carlo al puartà a lis estremis consecuencis cul suicidi a 23 agns. Di segnalâ che a Michelstaedter e je dedicade une sale dal Museu didatic da la Sinagoghe di Guriza.
 

L M M J V S D
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31
banner sistemazioni

 


Realizzazione del Sito: Servizio attività economiche e sviluppo turistico.
e-mail: turismo@comune.gorizia.it