logo
Il Portale turistico del Comune di Gorizia

 

link versione italianalink versione slovenalink versione friulanalink versione ingleseicona webcam
link alla homelink a contattilink alla mail
link alla storialink ad eventilink alle newslink ai percorsi a temalink alla ricettivitŕ link a prodotti tipicilink a links
Home > Itineraris > Borc Cjascjel

Itineraris

Borc Cjascjel

 
 
 

Il Cjastiel si jeve tra lis muris dal borc antîc, chel che lis fonts medievâls a clamin "tiere disore", là che si davuelzevin lis funzions aministrativis e judiziariis de Contee.

Il cjastiel al cambià aspiet plui di une volte vie pe so lungje storie: al fo mieç butât jù in timp di Prime Vuere Mondiâl e al fo tornât a fâ sù tai Agns Trente, cuant che a son stâts tornâts al edifici la plante pentagonâl e l'aspiet complessîf che lu caraterizavin tal secul XVI. Il cûr dal Cjastiel al è la Cort dai Lanzi, dulà che si viodin ancjemò ben lis fondis de alte torate centrâl che e fo butade jù vie pal Cinccent parcè che e jere masse debile cuintri de artiliariis. Di culì si rivin a viodi il Palaçut dai Conts dal Dusinte, e il Palaç dai Stâts Provinciâi, dal secul XV; invezit al è dal secul XVI-XVII il cussì clamât Palaçut Venit, che al lee i doi cuarps principâi.


Il Cjastiel di Guriza si mostre come une inmagante residence principescje: tal plan tiere si cjatin la piçule sale pal gustâ e la cusine, mobiliadis cun taulis e credincis antighis completis di massarie de tarde Ete di Mieç; di gnûf li dal plan tiere, l´ambient di grant atrat de sale dai Cavalîrs al ospite une biele colezion di armis che a vignivin dopradis te Contee di Guriza dal secul XI fintremai al secul XVI, che di fûr e je completade di riproduzions di machinis di vuere perfetis (in scjale 1 a 1), come catapultis e "sgarpions", che a vignivin dopradis pai assedis te Ete di Mieç.
Tal plan nobil si cjatin la Sale dal Cont, che vuê e je doprade par cunvignis e il Salon dai Stâts Provinciâi, dal sigûr l´ambient plui sugjestîf dal Cjastiel. Cheste sale grande, dulà che si mostre un puiûl di len graciôs e che e conserve un sofit a cassetons spetacolâr, e ospite ogni an mostris impuartantis. Di gnûf li dal prin plan, la Sale de musiche, che e à dentri riproduzions perfetis di struments musicâi de Ete di Mieç, insiorade da un sisteme didatic interatîf. Tal secont plan dal Palaçut dai Conts, in plui de racuelte capele palatine dedicade a Sant Bartolomiu, là che a son conservadis impuartantis telis di scuele venite, si cjate il cussì clamât Granâr, interessante sale didatiche dal Museu de Ete di Mieç gurizane, che e je furnide di cuatri plastics che a ilustrin tal ordin: la estension plui grande de Contee di Guriza; il disvilup de citât di Guriza; l´aspiet dal Cjastiel tor dal 1300; la ricostruzion dal assedi de citât de bande des trupis dal Patriarcje Bertrant tal 1340. Une stazion multimediâl e complete la sale.
Al merete fat un zîr pe Cjaminade di Ronde, di dulà che si pues amirâ un panorame unic pe sô bielece.


Dentri dal borc si jeve la Gleseute di Sant Spirt, dal Cuatricent e, li dongje, il biel edifici dal Sîscent dai conts Formentini, che cumò al è, dutun cu lis cjasis Dornberg e Tasso, sede dai Museus Provinciâi, che a presentin colezions artistichis une vore ricjis (a son di particolâr interès chês a rivuart dal periodi une vore fertil e creatîf dal Nûfcent gurizan) e il Museu de Vuere, museu innomenât, cu lis testemoneancis dal prin conflit mondiâl: doi soldâts, lis mudis che a apartignerin a diviers esercits, unîts de muart sul cjamp di bataie cussì, cuntune imagjin fuarte - memorie dai dîs milions cirche di soldâts muarts su ducj i fronts - si vierç al visitadôr il Museu. Il percors al va indenant zontraviers dîs salis, dulà che, tra armis, monturis, robis ordenaris, documentazions fotografichis e diviers cimelis, al è stât ricostruît, intun complès une vore interessant di memoriis, documents e cimelis, il senari dal enormi conflit che sul front italo-austriac al ve Guriza e il Lisuns tant che epicentri.

 

L M M J V S D
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31
banner sistemazioni

 


Realizzazione del Sito: Servizio attività economiche e sviluppo turistico.
e-mail: turismo@comune.gorizia.it