logo
Il Portale turistico del Comune di Gorizia

 

link versione italianalink versione slovenalink versione friulanalink versione ingleseicona webcam
link alla homelink a contattilink alla mail
link alla storialink ad eventilink alle newslink ai percorsi a temalink alla ricettivitŕ link a prodotti tipicilink a links
Home > Storie di Guriza > 1001-1500: La grande contee di Guriza

Storie di Guriza

1001-1500: La grande contee di Guriza

Il teritori al fo popolât de preistorie insù e si implantarin insediaments  romans, ma Guriza e ven menzionade par la prime volte ai 28 di Avrîl dal 1001, intun document là che l'Imperadôr Otto III al done la metât dal cjastiel di Salcan (Siliganum) e da la “vile che te lenghe dai Slâfs e ven clamade Gorica” (“gorica”, vâl a dî montagnute) al Patriarcje di Aquilee e chê altre metât al cont dal Friûl Werihen, da la cjasade dai Eppenstein. Il possès dal teritori gurizan al restà tes mans da la cjasade dai Eppenstein fin a tant che cheste dinastie e fo clamade a guviernâ il ducât carintian (tal 1090), e po e je disparide (1122-1125). A traviers di une intrigade linie di sucession, al domini de contee e rivà alore une cjasade che e jere za parone di tancj possediments in Austrie, ator di Millstatt, dulà che e veve fondât la innomenade badie.
I Conts di Guriza a saressin duncje dissendents drets dai conts di Pustertal e Lurngau, pûr jessint ancje in parintât cu la famee bavarese dai conts Ariboni: A la lidrîs da la cjasade a varessin di jessi Liutgard e il cont Aribo, fondadôr juste apont dal convent di Millstatt, che sora i conts di Guriza a esercitavin, fin dal principi, la lôr avocazie ereditarie. Lôr a verin doi fîs: Engelbert e chel Meginhard, o Meinhard, che al risulte citât ancje intun document aquileiês dal 1064, tant che “Meginardus de Guriza”. La storie dai Conts di Guriza e je leade fuart al Patriarcjât di Aquilee, stant che di chest a jerin i "avoiâi". I patriarcjis, cul domini sul Friûl, a rapresentavin un intop aes smiris di espansion dai Conts viers la planure padane. Di une tâl la schirie cence fin di scuintris che a jemplarin la storie de Ete di Mieç furlane. Te suaze di chescj conflits, ai 21 di Zenâr dal 1202, intune piçule glesie dongje Cormons, che lis ruvinis lis si viôt ancjemò, al fo concludût il Tratât di San Quarin, che al decretà il ricognossiment uficiâl ai Conts di Guriza dal plen possès de aree gurizane. I Conts a procurarin alore di completâ i lôr possediments sparniçâts cul unificâju e consolidâju in dominis ben circoscrits cu la costruzion di cjastiei, cun chê di distacâ cussì in maniere definitive il teritori di Guriza dal Patriarcjât.

Dal 1200 la impuartance dai Conts di Guriza tal Imperi e tache a cressi simpri di plui. Tal 1210 la citât e oten la concession imperiâl di tignî il marcjât une volte a l’an in ocasion de fieste di Sant Zuan Batiste. Simpri a Meinhard II i dan il privileç di bati monede. In chei stes agns, i Conts a tacarin a slargjâ il lôr podê bande la Istrie, intant che si fondave une unitât di interès tra Tirol e Guriza, lade a concludisi cul matrimoni di Meinhard III e Adelaide. Tal 1253, si realize la union tra lis conteis di Guriza e dal Tirol. Meinhard III al deventà cussì ancje Meinhard I dal Tirol. Intant, i Conts a rinfuarcissin ancje in Friûl la lôr supremazie: Albert prime e il fi Heinrich II dopo a rivarin a deventâ i vêrs siôrs de regjon cu la concuiste di Tumieç, Sacîl, Cjanive, Tresesin e altris tieris, in plui di Tulmin, te alte val dal Lusins. Fin Glemone vierzè lis puartis ai Gurizans.

Heinrich II, nassût tal 1266 e fi di Albert II, al fo salacôr la figure plui carismatiche de cjasade. Heinrich II al smirà di slargjâ i siei possediments tal teritori talian, batint une volte par dutis il Patriarcjât di Aquilee. Al ocupà part da la Cjargne. Si aleà po cun Verone, fasint un pat cun Cangrande Della Scala e al marcjà viers Trevîs e Padue, sometint chestis citâts tal 1319. Ma Heinrich II nol puartà insom il so grant progjet: tal 1323, a 57 agns, al mancjà di colp (e al è ancjemò un misteri, cussì che  a si è crodût a dilunc che al fos stât invelenât da sassins daûr comission dai Estensi) intant di un tratament. Sot di Heinrich II la Contee di Guriza e si slargje di cetant: la sô dominazion e lave de Istrie al Tirôl, dal Venit ae Slovenie di cumò.

Tra i sucessôrs di Heinrich II, di particolâr rimarc e fo la azion di Meinhard VII par sigurâ il sorevivi de dinastie, si ben che tal 1363 i conts a fossin stâts obleâts a cedi il Tirol ai Habsburg. Tal 1394 Heinrich IV, fi di Meinhard VII, al invià une dinastie cetant lungje, che e sarès durade fin al 1454.
Tal 1415, a Costanza, il cont Heinrich al ricevè dal re Sigismund di Ongjarie la solene investidure dai siei feuts imperiâi: la contee di Guriza cun dutis lis sôs pertignincis, la contee Palatine de Carintie, il tribunâl di Flambri in Friûl e la contee di Heunburg. Vignesie, intant, tal 1420 e butave jù in maniere definitive il cuasi milenari Patriarcjât di Aquilee, slargjant i siei possediments tal teritori di Belun e dongje dal Lusins.
Tal 1424, Heinrich IV e so fradi a scugnirin presentâsi a Vignesie, sicu erêts dai feuts furlans di Guriza, e partant sometûts a la Serenissime. Cheste azion e deventave par Vignesie reson di pretese su lis tieris gurizanis e su la stesse citât di Guriza: la Serenissima, ancje tal cuadri da lis disastrosis invasions dai Turcs in Friûl, e cjapà Gardiscje, fasint sù une fuartece. Ai 12 di Avrîl dal 1500, il cont Leonhard di Guriza-Tirol, che al veve sposât Paola Gonzaga, al murì cence erêts tal cjastiel di Bruck, dongje di Lienz.
 

L M M J V S D
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25
26
27
28
29
30
31
banner sistemazioni

 


Realizzazione del Sito: Servizio attività economiche e sviluppo turistico.
e-mail: turismo@comune.gorizia.it